Welkom by PENdit.za

Vir talentvolle Afrikaanse skrywers wat graag hul werk wil publiseer en met ander wil deel

Wat bied ons aan?

Wil jy graag as skrywer jou manuskrip in boekvorm sien? Drome word waar by PENdit.za. Afgesien van ons verskeie dienste, kan ons jou boek publiseer. Ons sal jou boek proeflees, redigeer en selfs die uitleg hanteer en buiteblad ontwerp. Ons kostes vergelyk uitstekend met die mark aangesien ons ons pryse kan aanpas. PENdit.za se publikasie – VLERKE en SES DAE – is deur ons lede as van die beste publikasies vir 2018 / 2019 aangewys. Dus is jou manuskrip in goeie hande. Ons derde publikasie word teen einde November uitgereik. Hierdie kortverhaalbundel handel oor tyd en tydperke oor die eeue heen met TYDPALET as tema. Ons lede op ons Facebookblad neem aan hierdie verskillende skryfuitdagings deel - jy kan ook! Sluit aan as lid op Facebook - PENdit.za. Beantwoord die drie vrae en ons aanvaar jou as lid.

Blootstelling aan Uitgewers

Blootstelling aan Uitgewers

Ons lede word in die kollig geplaas en aan groot uitgewers bekendgestel. Dus is ons goedgekeurde lede en hul skryfwerk van hoogstaande gehalte.
Ons blad word aan verskeie platforms gekoppel om jou meer blootstelling te gee. Dus stel ons voor dat ALLE SKRYFWERK eers geproeflees word alvorens dit op hierdie blad verskyn. PENdit.za Prima-lede trek groot voordeel uit ons Skrywersprofielblad.
Registreer by ons en sien jou skrywe pronk op 'n rak!

Slypskool

Slypskool

Ons bied 'n slypskool aan met unieke modules om jou as skrywer te slyp.
PENdit se aanbieders is nie net gewillige leermeesters nie, maar ook goeie skrywers wat met raad en daad dwarsdeur die slypskool advies verleen. Werkstukke word verskaf waar lede hulle nuutgevonde kennis kan toets. Hulle word ook aan hierdie werkstukke geëvalueer.
Daar word van lede verwag om aan die einde van die slypskool ʼn kortverhaal van ongeveer 1,500 woorde in te handig. Die beste verhaal kom in aanmerking vir publikasie. Erkenning word ook aan lede toegeken in die vorm van ’n besonderse sertifikaat.

Publikasies

Publikasies

Stories, kortverhale en enige ander manuskripte kan gepubliseer word onder die vaandel van PENdit.za. Ons plaas ook gekeurde werke van ons lede op hierdie blad.
Kompetisies word gereeld geplaas. Wenners van hierdie kompetisies se werk word gepubliseer deur PENdit.za in bundels soortgelyk aan ons Keurbundels – VLERKE en SES DAE – wat op ons webblad geadverteer word.
Ander instansies wat soortgelyke kompetisies bied waar prysgeld en ander pryse aangebied word, word ook op hierdie webblad geadverteer. Hou gerus ons plasings dop.
Ons stuur ook 'n tweeweeklikse nuusbrief uit, PENbrief - waarin 'n magdom artikels voorkom wat as hulpbronne dien vir ons lede. Kyk gerus na ons POSTE.

Ons PENdit.za Span

Ons stel ons graag aan jou voor.

Kommentaar van ons lede

Hierdie is die BESTE webblad om jouself bloot te stel aan uitgewers en ook om jou werk te publiseer. Ek het geweldig baat gevind by hul slypskool - Belinda Blignaut

img

Ons slypskool maak gebruik van die beste module wat verskeie onderwerpe dek, onder andere, beplanning van verhaal, vertrekpunte, persoonsvertellers, karakters en dialoog - om net 'n paar te noem. Verryk jou kennis - laat jou pen praat.

Ronel Dunn & Bets Koen - Slypskoolsaamstellers en -aanbieders

PENdit.za Nuus

Ons heel nuutste plasings (POSTS) word hier aangewys. Vir ouer poste, klik op die artikel se naam wat regs op elke bladsy verskyn. By SLYPSKOOL word hulpbronne aangedui waarvan jy gebruik kan maak.

ENGELA – gewilde Kortverhaalbundel – Nico Schamrel

BESTEL: http://pendit.co.za/afrikaanse-boeke-deur-talentvolle-afrikaanse- skrywers/

KINDLE AFLAAI: http://amazon.com/author/nico-schamrel

ENGELA is ’n samevoeging van verskeie kortverhale wat uiteenlopende emosies wek – hartseer, geluk, liefde en die onvermydelike intriges van menswees. Dit lei tot vrae, antwoorde en soms die onverklaarbare.

Die twee kortverhale oor Engela, is ’n huldeblyk aan die skrywer se ma.

RESENSIE – deur Prof. dr. GJ van Jaarsveld (em.) D.Lit. (UV), MA (RAU), THOD (NKP)

“In jou kop is jou drome en jou stories; jou eie wêreld, ’n fantasie met verbeeldingsvlugte vol wonderwerke. Dit wat nie mooi is nie, kan jy inkleur in jou kop.”

Die aanhaling kom uit een van Nico se kortverhale in hierdie bundel. Hy kon nie sy eie skryfwerk beter beskryf het nie! Dit beskryf presies wat hy doen. Hy het die gawe om uit ‘n eenvoudige storielyn fantasie op te tower. Met fyn nuanses lok hy die leser om dieper te lees en emosies te ervaar as wat soms aardse, eenvoudige karakters sou suggereer en wat aan elkeen van sy stories ‘n diep menslike karakter gee. Hy stel ons voor aan karakters wat groter is en meer beleef as die hier en nou.

Hy vleg temas uit folklore, legendes en sprokies en dikwels uit die Bybel vernuftig in die konstruksie van sy verhale in en bring dit tot diepsinnige en verrassende ontknopings. Die eg menslike stories grens dikwels aan die bonatuurlike en feëtjieverhale met ‘n ryk simboliek. Hy trek jou tot binne-in die stories met haarfyn beskrywings van die situasies en atmosfeer.

Nico kleur elke verhaal in met verrassende, glashelder, visuele tonele. Hy put ryklik uit die natuur en jy kan dit as’t ware sintuiglik ervaar deur sy fyn en raak beskrywings. Hy munt die skat van die Afrikaanse taal in ongewone, funksionele beskrywings; in die gebruik van idiome; metafore en vergelykings, en in ongewone woordkeuses.  In bykans paragraaf na paragraaf staan jy verstom oor die skrywer se ryk woordeskat; sy spel met die taal; die maklike wisseling tussen die letterlike en die figuurlike. Verhale wat so ingekleur is, is net ‘n genot om te lees!

Lesers moet nie verwag om die tipiese tydskrifkortverhale in ENGELA te lees nie. Sy verhale is in ‘n klas van hulle eie; vir die fynproewer tot oneindige genot; vir voornemende skrywers ‘n literêre les. Vir ons ander? Lees self!

Dankie Nico, vir jou kop vol stories; vir hierdie wonder-werk en dankie dat jy dit vir ons so mooi inkleur.

Baie geluk met ’n pragtige bundel!

Karakters in verhale

KARAKTERS EN EMOSIES:

 ‘n Romanse of liefdesroman moet verkieslik karaktergedrewe en emosie-gedrewe wees, eerder as gebeure-gedrewe soos ‘n spanningsroman. M.a.w. elke aksie of reaksie van jou karakter moet spruit uit wie sy is en hoe sy voel op daardie oomblik, anders skep jy kartonkarakters wat jou lesers gou sal verveel. Dis al klaar ‘n mondvol en die spasie hier is te min om werklik reg aan hierdie onderwerp te laat geskied, maar ek hoop om darem die beginkrywer te prikkel om meer hieroor te gaan nalees voordat sy haar eerste manuskrip blindelings aanpak. Die skrywer moet doodseker maak dat sy haar karakters, hul emosies en hul leefwêreld verstaan voordat sy een enkele bladsy skryf. Die eerste stap vir die skrywer is dus navorsing. Dit is nodig dat daardie spesifieke karakter wat jy beplan in die konteks wat jy vir hom skep, inpas sodat jou storie geloofwaardig sal wees.

SONDER KONFLIK IS DAAR NIE ’N STORIE NIE:

Konflik is die brandstof wat aksie en reaksie veroorsaak en die storie laat gebeur. Daar moet verandering plaasvind tydens die verloop van die verhaal, anders gaan die leser baie gou die boek neersit. In die romanse is dit die liefdesverhouding wat ontwikkel en groei. In die liefdesroman is dit die reis wat die heldin neem na ‘n ander plek in haar lewe en langs die pad groei en ontwikkel sy in die verhoudinge met die mense om haar. Dit kan nie gebeur sonder konflik nie. Hetsy dit innerlike konflik is waarmee die karakter worstel of konflik met die mense om haar en die dinge wat in haar lewe gebeur, konflik is essensieel om die storie voort te dryf. Wanneer die skrywer dus haar storie beplan, is konflik die heel belangrikste bestanddeel wat sy moet inbou. Ons verwys weereens die beginskrywer na die boeke oor die skryfkuns wat ons aanbeveel en ons vra ervare skrywers om te vertel hoe hulle te werk gaan om konflik in hul stories in te bou.

http://pendit.co.za/afrikaanse-boeke-deur-talentvolle-afrikaanse-skrywers/

Hasepad Uitgewers

Wil jy graag jou manuskrip, boek of skrywes publiseer?

HASEPAD UITGEWERS bied jou die geleentheid, gratis! Stuur jou geproefleesde manuskrip aan Hasepad. Hasepad Uitgewers skep vir jou ‘n profiel en skakel na jou profiel en boeke. Hulle bemark daarna jou boek dat die rook trek. Jou boek is dan wêreldwyd beskikbaar en aflaaibaar – toegangklik vir almal.

KIES DIE HASEPAD!

E-pos navrae: admin@hasepad.com

Webwerf: www.hasepad.com

Sel: 082 344 5641